Rekord i ri i mbajtjes së frymës /video/

Herën tjetër që bëni garë me shokët në det se kush e mban frymën më tepër nën ujë, mendohuni mirë: dikush tjetër mund të bëjë shumë herë më mirë se ju.

Stig Severinsen, kampion bote në zhytjen e lirë dhe ekspert i frymëmarrjes, hyn në rekordet Gines si njeriu që qëndron më gjatë pa marrë frymë, plot 22 minuta.
Para se të zhyste kokën në ujin e pishinës, Severinsen u mbush me oksigjen të pastër në mënyrë që trupi të ishte i ngopur. Gjithsesi, arritja e tij mbetet mbresëlënëse.

Gjatë dhjetëvjeçarit të fundit, danezi ka eksperimentuar me metoda të ndryshme të frymë-mbajtjes për të parë efektet e saj në mendje dhe trup. Ai madje ka shkruar edhe një libër për këtë.

39-vjeçari e ka kaluar thuajse tërë jetën e tij në dhe rreth ujit, ndaj, nëse po prisni që dikush tjetër ta thyejë rekordin e tij, mos e mbani frymën.